Aus Vs PAK - બીજી ટેસ્ટના બીજા દિવસે પાકિસ્તાને 68 રનમાં 6 વિકેટ લઇ 318 પર સમેટી લીધુ ઓસ્ટ્રલીયાને

Aus Vs PAK – બીજી ટેસ્ટના બીજા દિવસે પાકિસ્તાને 68 રનમાં 6 વિકેટ લઇ 318 પર સમેટી લીધુ ઓસ્ટ્રલીયાને

મેલબોર્ન ક્રિકેટ ગ્રાઉન્ડ ખાતે ઓસ્ટ્રેલિયા અને પાકિસ્તાન વચ્ચે ત્રણ મેચની ટેસ્ટ શ્રેણીની બીજી મેચ રમાઈ રહી છે. 26 ડિસેમ્બરથી શરૂ થયેલી આ બોક્સિંગ ડે ટેસ્ટનો પ્રથમ દિવસ ઓસ્ટ્રેલિયાના નામે હતો, પરંતુ બીજા દિવસે પાકિસ્તાને જોરદાર વળતો પ્રહાર કર્યો હતો. મેલબોર્નમાં રમાઈ રહેલી બીજી ટેસ્ટમાં પાકિસ્તાને જોરદાર વાપસી કરી છે. બીજા દિવસે પાકિસ્તાનના ઝડપી બોલરો સામે ઓસ્ટ્રેલિયાના બેટ્સમેનોને કોઈ સફળતા મળી ન હતી.

બીજી ટેસ્ટના બીજા દિવસે ઓસ્ટ્રેલિયાની ટીમ 318 રનમાં ઓલઆઉટ થઈ ગઈ હતી. જોકે, એક સમયે કાંગારૂઓનો સ્કોર માત્ર 4 વિકેટે 250 રન હતો, પરંતુ પાકિસ્તાની બોલરોએ જોરદાર વાપસી કરીને છેલ્લી 6 વિકેટ માત્ર 68 રનમાં જ પાડી દીધી હતી.

ઓસ્ટ્રેલિયાનો લોઅર ઓર્ડર પાકિસ્તાની બોલરોનો સામનો કરી શક્યો નહોતો. વિકેટકીપર બેટ્સમેન એલેક્સ કેરી ફરી એકવાર ફ્લોપ રહ્યો હતો. ઓસ્ટ્રેલિયા તરફથી માર્નસ લાબુશેને સૌથી વધુ 63 રન બનાવ્યા હતા. જ્યારે મિચેલ માર્શે 6 ચોગ્ગા અને એક છગ્ગાની મદદથી 41 રનની ઇનિંગ રમી હતી. મિચેલ સ્ટાર્ક 09 રન, કેપ્ટન પેટ કમિન્સ 13 અને નાથન લિયોને 08 રન બનાવીને પેવેલિયન પરત ફર્યા હતા.

પાકિસ્તાન માટે ફાસ્ટ બોલર આમિર જમાલ સૌથી સફળ રહ્યો હતો. આમિરે સૌથી વધુ ત્રણ વિકેટ લીધી હતી. તેણે માર્નસ લાબુશેન, સ્ટીવ સ્મિથ અને પેટ કમિન્સને પોતાનો શિકાર બનાવ્યો. જ્યારે શાહીન શાહ આફ્રિદીએ ટ્રેવિસ હેડ અને એલેક્સ કેરીને પેવેલિયન મોકલ્યા હતા. આ સિવાય મીર હમઝા અને હસન અલીને પણ બે-બે વિકેટ મળી હતી. સલમાન આગાએ પણ એક વિકેટ લીધી હતી.

પાકિસ્તાનની ટીમ પ્રથમ ટેસ્ટમાં ખરાબ રીતે હારી ગઈ હતી. ઓસ્ટ્રેલિયાએ પ્રથમ ટેસ્ટમાં 360 રનનો વિશાળ વિજય નોંધાવ્યો હતો. આવી સ્થિતિમાં, જો શાન મસૂદની ટીમ આ શ્રેણીમાં ટકી રહેવા માંગે છે, તો તેણે કોઈપણ કિંમતે આ ટેસ્ટ જીતવી પડશે અથવા ડ્રો કરવી પડશે.